COVID-19 véksinól cómmonde
Australiat 5 bosór adde híar woror boiccá fotti zon, ar 6 mac óttu 4 bosór boiccá bazu fuwain COVID-19 véksin or laayek.
Ekkán kiliník tuwain nam lekádo
COVID-19 véksin ókkol Australiat beggún ólla maana. Medicare kaádh sára manúic, bidecí beroiya ókkol, dec-bidecí eskuillafuwa ókkol, muhájer ham goróiya ókkol adde faná soíya ókkol eçé cáamel asé. Véksin mariféloon gán é tuñáre, tuñáre fémli adde tuñár sómaj óre COVID-19 óttu basité modot goré.
Australi Hókumot é véksin mara ré laazemi noógoré, ar COVID-19 ólla tuñúi véksin nomara ekteyar gorífaribá
Háas hálabostá ókkol ot bazu estéit ar teritorir umumi sehét óttu véksin mara ré laazemi gorítfare. Mesál, bazu kisím ór soñori ókkol ólla adde bazu sómaji hazhormo ókkol ólla.
Véksin ókkol maháfuz
COVID-19 véksin ókkol mara maháfuz ar híiné jan ókkol basa. Australiat, Therapeutic Goods Administration (TGA) COVID-19 ór sólamoti ar asór ókkol óre dhákottu nozordari gorát asé.
Australiat asé fotti oggúa véksin cómmonde becí gorí zanilo:
COVID-19 véksin ókkol é tuñár jisím óre váires óttu hálasi faa cíkaibó , zodi tuñúi híba loi talluk ot aiyó.
Tuñár véksin marar baade tuñáttu honó súwal yá sinta ókkol tákíle, tuñár véksin marar kiliník yá daktor loi talluk goró.
Tuñár véksin marar baade ki acágorár aséde hían cómmonde becí gorí zanilo.
Hone véksin marazoonsá
5 bosórjja adde híar woror fottizon e COVID-19 or khélaf véksin mariféloonsá.
COVID-19 loi becí occúkka bona yáto mora attú COVID-19 véksin mara ye tuñáre basaibó.
Véskin mara ye tuñár atraf or manúic óre yó basaité modot goré váires or fóilani ré homaiyoré.
Tuñár COVID-19 véksin mara loi torutaza tákibollá, tuñár boc adde sehéti hajot ókkol hísafe wosíyot goijjá foijjal ókkol beggún tuñáttu luaforibó.
6 mac óttu 4 bosórjja bazu gura fuwain zará firazárani cókti becí komzur goijjá, yáto zaráttu ekkán maazuri asé, héndhilla uitará zaráttu cíyaikka ar/yáto hoekkán sehéti mockilat ókkol asé ziín é hítarar hora COVID-19 or hótora ré baráiye hítara COVID-19 véksin or laayek.
Boc gurúp ibálla nam leká diya ókkol ehón Vaccine Clinic Finder or zoriya kúla asé. Niyom mote sek gorí soó, zehón epóinmen ókkol óre firazárani gorídoiya ókkol é diya zari rakíbo.
Boc 6 mac óttu 4 bosórjja fuwain dé loonsá:
- COVID-19 véksin or buniyadi foijjal 1 adde 2
- buniyadi foijjal 3 zodi hítara firazárani cókti becí komzur goijjá.
Boc 5 ottú 11 bosórjja fuwain dé loonsáde:
- COVID-19 véksin or buniyadi foijjal 1 adde 2
- buniyadi foijjal 3 zodi hítara firazárani cókti becí komzur goijjá.
Boc 12 ottú 15 bosórjja fuwain dé loonsáde:
- COVID-19 véksin or buniyadi foijjal 1 adde 2
- buniyadi foijjal 3 zodi hítara firazárani cókti becí komzur goijjá.
- COVID-19 véksin or asór baróoni ek foijjal zodi hítara/hítarattu:
- firazárani cókti becí komzur goijjá
- dhoñór yá cíyaikka sehéti hájot ókkol ólla ekkán maazuri asé
- cíyakkya ar/yá hoekkán sehéti mockilat ókkol asé ziín é hora COVID-19 or hótara ré baráiye.
Tuñár daktor loi hotá hoó zodi tuñúi fakka nozanó déki tuñár fuwa ye asór baróoni loonsáne.
Boc 16 bosór ar híar woror beggún é loonsá:
- COVID-19 véksin or buniyadi foijjal 1 adde 2
- buniyadi foijjal 3 zodi hítara firazárani cókti becí komzur goijjá
- COVID-19 véksin or oggúa asór baróoni foijjal.
Sairor foijjal ókkol
COVID-19 véksin or oggúa battí asór baróoni, yáto sairor foijjal or wosíyot gorá giyyé hora ocúk or hótora baráiya aséde manúic ólla, zibáre hítarar foóila asór bafóoni foijjal or 3 mac baade mara foribó.
Ibá fañsor foijjal óibo oi manúic ólla, zará firazárani cókti becí komzur goijjá, ar hítarattu buniyadi sehéti mockilat yáto maazuri asé.
Tuñáttu sairor foijjal loonsá zodi tuñúi:
- 50 bosórjja yáto híar wore
- buráburír saásita yáto maazur or saásitar gór to ekzon tákoiya
- firazárani cókti becí komzur goijjá (ibá fañs or foijjal óibo)
- Aboriginal yáto Torres Strait Islander ar 50 bosór yáto híar woror boiccá
- 16 bosórjja yáto híar wore ar eén sehéti mockilat ola de zián é hora VID-19 ocúk ór hótora barái diyyé
- 16 bosórjja yáto híar wore maazuri yáto becí cíyaikka sehéti hájot ókkol ola.
30 óttu 49 bosórjja manúic é sair or foijjal loifaribó zodi hítara ekteyar goré.
Tuñár daktor loi hotá hoó zodi tuñúi fakka nozanó deki tuñáttu asór baróoni sair or foijjal loonsáne.
Zodi tuñúi COVID-19 loi pozítiv óiyo, toíle wosíyot gorázar deki COVID-19 farár baade tuñáttu 3 mac entezar gorá foribó tuñár sárme COVID-19 véksin loibar age.
Nizor asór baróoni foijjal loi baade ze manúic óttu COVID-19 óiye sair or foijjal loibar age hítara yó 3 mac entezar goróonsa.
Tuñár COVID-19 véksin ókkol loi torutaza becí zorurui. Alog alog manúic óttu alog alog COVID-19 véksin ókkol lagitfare alog alog thaim ókkol ot. Tuñár sehéti hédmot zuhar gorídoiya loi hotá hoó tuñúi ar tuñár fémili torutaza tákite ki lagibóde hían ólla.
Fuwain
Fuwaindólla COVID-19 véksin ókkol maháfuz.
Tuñár báiboináin, dadadadiáin, ar bor sómaj or híkka váires fargorái doon ottú fuwaindóre rukíte fuwaindór véksin mara ye modot goré.
Fuwian ar nojuwan ókkol ólla COVID-19 véksin ókkol cómmonde becí gorí zanilo.
Háamel ar dud-hábani maiya fuwain
COVID-19 véksin ókkol maháfuz zodi tuñúi háamel, dud-háboór, yáto cóm óibar plan gorór. Cóm or zehonó woktót tuñúi véksin loifaribá.
Cóm, dud-hábani ar COVID-19 véksin ókkol cómmonde becí gorí zanilo.
Maazuri ola manúic
Maazuri ola manúic COVID-19 loi hora ocúk or dhoñór hótorat asé, ar hítara véksin mariféloonsá.
Zodi tuñáttu beec modot ar ból lage, Disability Gateway Helpline óre tuñúi 1800 643 787 ot koól gorífaribá. Hítara tuñálla nam leká difaribó.
Zodi tuñáttu ekzon buzáidoiya lage, Translating and Interpreting Service óre 131 450 ot koól goró, ar hítararé hoó Disability Gateway ré phún goríbólla.
Ageloti sehéti mosóla ókkol ola manúic
Ageloti sehéti mosóla ókkol ola manúic COVID-19 loi hora ocúk or beec dhoñór hótarat asé ar hítara véksin mariféloonsá.
Tuñár niyomi sehéti hédmot zuhar gorí doiya loi hotá hoó tuñár hálabostá llá becí bála véksin cómmonde.
Hoçé véksin marazaibo
Tuñúi oggúa COVID-19 véksin faiba de eçéya:
- Commonwealth véksin marar kiliník ókkol
- córik óiye dé aám daktori ham goróoiya ókkol
- Aboriginal Controlled Community Health Services
- estéit adde teritori véksin marooni kiliník ókkol, ar
- córik óiyedé fármesi ókkol.
Aám daktori goróoiya ókkol é tuñáttu véksin ólla dam loitfare.
Ekbere hañsór véksin marooni kiliník tuwaibólla ar tuñár epóinmen leká dibollá, Vaccine Clinic Finder estemal goró. Zodi tuñáttu tuñár véksin or empóinmen ot mazé phún ot yáto zagat buzáidiyar zorurot fore, Translating and Interpreting Service óre 131 450 ot koól goró.
Zoid tuñáttu ekkán Medicare kaádh notáke
Zodi tuñáttu ekkán Medicare kaádh notáke, tuñúi maana véksin mara háasel gorífaribá eçé:
- Commonwealth véksin marar kiliník ókkol
- estéit yá teritorir véksin marar kiliník ókkol
- córik óiyedé fármesi ókkol.
Tuñár COVID-19 véksin or age
Zodi tuñúi hían aijó noógoró, toóile oggúan epóinmen lekádo.
ekkán kiliník tuwain nam lekádo
Zodi tuñáttu ekkán Medicare kaádh táke, tuñár tofsil ókkol torutaza né cek goró:
- myGov or zoriya Medicare onláin ekóun óttu
- Express Plus Medicare app ot
- Services Australia ré koól goríyore.
Ekkán razinama fárom fura goríbólla tuñáre huázaitfare tuñár epóinmen or age, yáto zodi tuñúi oinnozon ollá véksin marar epóinmen loórdde óile.
Razinama fárom cómmonde foró.
5 ottú 11 bosórjja fuwain dólla maalumat ar razinama fárom gán foró.
Tuñár COVID-19 véksin or baade
Véksin marar baade ekkán omil ozattya uzan baánir súurot ot tuñáre 15 minít ólla nozordari gorázaibo. Tuñáre véksin mare manúic gúa cíkka faiya héhon uzan baáni ókkol óre juab dibollá.
COVID-19 véksin ókkol ór dháikka asór ókkol hámicá hálka, ar 1 ottú 2 din ot zagói. Dhákkya asór ókkol ót cáamel asé iín:
- injekcén or zagat bic yáto fúláni
- hórani
- matá hoñorani ókkol
- gusso bic
- zor adde cít.
Zehonó dabai yáto véksin or dhoilla, eçé yó hom-mil yáto ozana dháikka sór ókkol tákifare. Tuñáttu hótorna dháikka asór ókkol asé boli tuñúi tháarilé, tuñár sehéti saásitar mahér, yáto National Coronavirus Helpline óre talluk goró.
Zodi tuñáttu ekzon buzáidoiya lage, National Coronavirus Helpline óre koól goró ar ekteyar 8 basó.
Véksin marar sóbut
Tuñár Immunisation History Statement ot góliyore tuñúi nizor COVID-19 véksin marar sóbut hásel gorífaribá.
Tuñár Immunisation History Statement óre tuñúi lootfaiba de:
- onláin ot, tuñár myGov ekóun banaiyoré ar tarfore tuñár Medicare onláin ekóun ot góliyore
- Express Plus Medicare mubáil app or maárófote.
Zodi tuñáttu Medicare kaádh notáke yáto myGov ekóun ot focí nofaró, tuñúi tuñár Immunisation History Statement lootfaiba de eçé:
- tuñár véksin mari dooiya ré tuñálla ek kopí sábaibollá hoóiyóre; yá
- Australian Immunisation Register inkúari ókkol or lain óre 1800 653 809 (8 biínna - 5 házuinna Cómbar ottú Cúkkarbar AEST) ot koól goríyore, ar tuñar hañsé dhak ot tuñyar boyan nama difeçáibólla hítara hoóiyóre. Dhak ot aibólla hían é 14 din lagitfare.
Tuñár COVID-19 véksin marar sóbut keén gorí háasel goríba de hían or babote beec maalumat ollá, soó Services Australia wébsáit.
Biccáci maalumat ollá hoçé zaaforibó
COVID-19 adde COVID-19 véksin marar program or babote biccáci ar ofísiel zoriya ókkol óttu zani tákóon becí zoruri.
COVID-19 véksin ókkol or babote aám súwal ókkol or juwab ókkol 63 zuban ot asé.
COVID-19 véksin or babote boút zuban ot usíl ókkol aséde ek thal maalumat mowjud asé.
Beec maalumat foró tuñár zuban ot COVID-19 cómmonde.
