COVID-19 véksinól cómmonde

Australiat asé de 5 bosórjja adde híar woror manúic beggún é ehón véksin marar nam leká difaribó.

Ekkán kiliník tuwain nam lekádo

COVID-19 véksin ókkol Australiat beggún ólla maana. Medicare kaádh sára manúic, bidecí beroiya ókkol, dec-bidecí eskuillafuwa ókkol, muhájer ham goróiya ókkol adde faná soíya ókkol eçé cáamel asé. Véksin mariféloon gán é tuñáre, tuñáre fémli adde tuñár sómaj óre COVID-19 óttu basité modot goré.

Australi Hókumot é véksin mara ré laazemi noógoré, ar COVID-19 ólla tuñúi véksin nomara ekteyar gorífaribá

Háas hálabostá ókkol ot bazu estéit ar teritorir umumi sehét óttu véksin mara ré laazemi gorítfare. Mesál, bazu kisím ór soñori ókkol ólla adde bazu sómaji hazhormo ókkol ólla.

Véksin ókkol maháfuz

COVID-19 véksin ókkol mara maháfuz ar híiné jan ókkol basa. Australiat, Therapeutic Goods Administration (TGA) COVID-19 ór sólamoti ar asór ókkol óre dhákottu nozordari gorát asé.

Australiat asé fotti oggúa véksin cómmonde becí gorí zanilo:

COVID-19 véksin ókkol é tuñár jisím óre váires óttu hálasi faa cíkaibó , zodi tuñúi híba loi talluk ot aiyó.

Tuñár véksin marar baade tuñáttu honó súwal yá sinta ókkol tákíle, tuñár véksin marar kiliník yá daktor loi talluk goró.

Tuñár véksin marar baade ki acágorár aséde hían cómmonde becí gorí zanilo.

Hone véksin marazoonsá

5 bosórjja adde híar woror fottizon e COVID-19 or khélaf véksin mariféloonsá.

COVID-19 loi becí occúkka bona yáto mora attú COVID-19 véksin mara ye tuñáre basaibó.

Véskin mara ye tuñár atraf or manúic óre yó basaité modot goré váires or fóilani ré homaiyoré.

Tuñár COVID-19 véksin mara loi torutaza tákibollá, tuñár boc adde sehéti hajot ókkol hísafe wosíyot goijjá foijjal ókkol beggún tuñáttu luaforibó.

5 ottú 15 bosórjja fuwain dé loonsáde:

  • COVID-19 véksin or buniyadi foijjal 1 adde 2
  • buniyadi foijjal 3 zodi hítara firazárani cókti becí komzur goijjá.

16 bosórjja adde híar woror boiccá beggún é loonsáde:

  • COVID-19 véksin or buniyadi foijjal 1 adde 2
  • buniyadi foijjal 3 zodi hítara firazárani cókti becí komzur goijjá
  • COVID-19 véksin or asór baróoni ek foijjal.

Tuñáttu COVID-19 cít hallya foijjal oggúa yó loonsá zodi tuñár asór baróoni foijjal tuñúi 4 mac age loifélaiyó, ar tuñúi:

  • 65 bosórjja yáto híar wore
  • Buráburír saásita yáto maazurir saásitar gót to ekzon tákoiya
  • 16 bosórjja yáto híar wore ar firazárani cókti becí komzur goijjá
  • Aboriginal yáto Torres Strait Islander ar 50 bosór yáto híar woror boiccá.

Zodi COVID-19 ólla tuñár theés pozítiv óiye, toóile tuñár COVID-19 véksin sárme foijjal tuñúi loibar age 3 mac entezar gorár wosíyot gorázar.

Manúic zaráttu nizor asór baróoni foijjal or baade COVID-19 óiye, hítara cít hallya foijjal loibar age homot 3 mac entezar goróonsá.

Tuñár COVID-19 véksin ókkol loi torutaza becí zorurui. Alog alog manúic óttu alog alog COVID-19 véksin ókkol lagitfare alog alog thaim ókkol ot. Tuñár sehéti hédmot zuhar gorídoiya loi hotá hoó tuñúi ar tuñár fémili torutaza tákite ki lagibóde hían ólla.

Fuwain

Fuwaindólla COVID-19 véksin ókkol maháfuz.

Tuñár báiboináin, dadadadiáin, ar bor sómaj or híkka váires fargorái doon ottú fuwaindóre rukíte fuwaindór véksin mara ye modot goré.

Fuwian ar nojuwan ókkol ólla COVID-19 véksin ókkol cómmonde becí gorí zanilo.

Háamel ar dud-hábani maiya fuwain

COVID-19 véksin ókkol maháfuz zodi tuñúi háamel, dud-háboór, yáto cóm óibar plan gorór. Cóm or zehonó woktót tuñúi véksin loifaribá.

Cóm, dud-hábani ar COVID-19 véksin ókkol cómmonde becí gorí zanilo.

Maazuri ola manúic

Maazuri ola manúic COVID-19 loi hora ocúk or dhoñór hótorat asé, ar hítara véksin mariféloonsá.

Zodi tuñáttu beec modot ar ból lage, Disability Gateway Helpline óre tuñúi 1800 643 787 ot koól gorífaribá. Hítara tuñálla nam leká difaribó.

Zodi tuñáttu ekzon buzáidoiya lage, Translating and Interpreting Service óre 131 450 ot koól goró, ar hítararé hoó Disability Gateway ré phún goríbólla.

ageloti sehéti mosóla ókkol ola manúic

ageloti sehéti mosóla ókkol ola manúic COVID-19 loi hora ocúk or beec dhoñór hótarat asé ar hítara véksin mariféloonsá.

Tuñár niyomi sehéti hédmot zuhar gorí doiya loi hotá hoó tuñár hálabostá llá becí bála véksin cómmonde.

Hoçé véksin marazaibo

Tuñúi oggúa COVID-19 véksin faiba de eçéya:

  • Commonwealth véksin marar kiliník ókkol
  • córik óiye dé aám daktori ham goróoiya ókkol
  • Aboriginal Controlled Community Health Services
  • estéit adde teritori véksin marooni kiliník ókkol, ar
  • córik óiyedé fármesi ókkol.

Aám daktori goróoiya ókkol é tuñáttu véksin ólla dam loitfare.

Ekbere hañsór véksin marooni kiliník tuwaibólla ar tuñár epóinmen leká dibollá, Vaccine Clinic Finder estemal goró. Zodi tuñáttu tuñár véksin or empóinmen ot mazé phún ot yáto zagat buzáidiyar zorurot fore, Translating and Interpreting Service óre 131 450 ot koól goró.

Zoid tuñáttu ekkán Medicare kaádh notáke

Zodi tuñáttu ekkán Medicare kaádh notáke, tuñúi maana véksin mara háasel gorífaribá eçé:

  • Commonwealth véksin marar kiliník ókkol
  • estéit yá teritorir véksin marar kiliník ókkol
  • córik óiyedé fármesi ókkol.

‘Hey Eva’ – Véksin Aásán Lootfaani

EVA, óiyede ekkán maamuli wafes dhahani hédmot manúic óre COVID-19 véksin ólla nam leká dite modot goríbólla. Biínna 7 loti 10 (AEST) baze fujjonto, háftaye 7 din EVA salu táke.

Oggúa COVID-19 véksin ólla nam leká dite tuñáttu modot lagilé, 0481 611 382 ot ekkán ‘Hey EVA’ lekí meséij do.

Zehón tuñúi EVA lekíba tuñúi ekkán juwab faiba zián é fusár goríbo:

  • nam
  • fosón or zuban
  • munaséb tarík ar thaim
  • wafes koól ólla beétor nombór.

National Coronavirus Helpline óttu ekzon cíkka faiya phún-saloiya ye tuñáre thík goijjá thaim gán ot koól goríbo tuñár COVID-19 véksin marar nam leká dite modot goríbólla.

COVID-19 véksin ókkol or babote EVA ye maalumat adde mocwara de ar modot goré:

  • COVID-19 véksin ókkol or babote maalumat adde mocwara diya
  • epóinmen sára kiliník faite tuñáre modot gorá
  • véksin ólla oggúa munaséb epóinmen faite tuñáre modot gorá
  • maana buzáidoiya modotgar loi tuñáre rabeta gorí diyar sáñte.

Tuñár COVID-19 véksin or age

Zodi tuñúi hían aijó noógoró, toóile oggúan epóinmen lekádo.

ekkán kiliník tuwain nam lekádo

Zodi tuñáttu ekkán Medicare kaádh táke, tuñár tofsil ókkol torutaza né cek goró:

Ekkán razinama fárom fura goríbólla tuñáre huázaitfare tuñár epóinmen or age, yáto zodi tuñúi oinnozon ollá véksin marar epóinmen loórdde óile.

Razinama fárom cómmonde foró.

5 ottú 11 bosórjja fuwain dólla maalumat ar razinama fárom gán foró.

Tuñár COVID-19 véksin or baade

Véksin marar baade ekkán omil ozattya uzan baánir súurot ot tuñáre 15 minít ólla nozordari gorázaibo. Tuñáre véksin mare manúic gúa cíkka faiya héhon uzan baáni ókkol óre juab dibollá.

COVID-19 véksin ókkol ór dháikka asór ókkol hámicá hálka, ar 1 ottú 2 din ot zagói. Dhákkya asór ókkol ót cáamel asé iín:

  • injekcén or zagat bic yáto fúláni
  • hórani
  • matá hoñorani ókkol
  • gusso bic
  • zor adde cít.

Zehonó dabai yáto véksin or dhoilla, eçé yó hom-mil yáto ozana dháikka sór ókkol tákifare. Tuñáttu hótorna dháikka asór ókkol asé boli tuñúi tháarilé, tuñár sehéti saásitar mahér, yáto National Coronavirus Helpline óre talluk goró.

1800 020 080

Zodi tuñáttu ekzon buzáidoiya lage, National Coronavirus Helpline óre koól goró ar ekteyar 8 basó.

Véksin marar sóbut

Tuñár Immunisation History Statement ot góliyore tuñúi nizor COVID-19 véksin marar sóbut hásel gorífaribá.

Tuñár Immunisation History Statement óre tuñúi lootfaiba de:

Zodi tuñáttu Medicare kaádh notáke yáto myGov ekóun ot focí nofaró, tuñúi tuñár Immunisation History Statement lootfaiba de eçé:

  • tuñár véksin mari dooiya ré tuñálla ek kopí sábaibollá hoóiyóre; yá
  • Australian Immunisation Register inkúari ókkol or lain óre 1800 653 809 (8 biínna - 5 házuinna Cómbar ottú Cúkkarbar AEST) ot koól goríyore, ar tuñar hañsé dhak ot tuñyar boyan nama difeçáibólla hítara hoóiyóre. Dhak ot aibólla hían é 14 din lagitfare.

Tuñár COVID-19 véksin marar sóbut keén gorí háasel goríba de hían or babote beec maalumat ollá, soó Services Australia wébsáit.

Biccáci maalumat ollá hoçé zaaforibó

COVID-19 adde COVID-19 véksin marar program or babote biccáci ar ofísiel zoriya ókkol óttu zani tákóon becí zoruri.

COVID-19 véksin ókkol or babote aám súwal ókkol or juwab ókkol 63 zuban ot asé.

Beec maalumat foró tuñár zuban ot COVID-19 cómmonde.

Asbab ókkol

Language: 
Rohingya - Ruáinga
Last updated: 
13 May 2022