දීර්ඝකාලීන COVID ගැන
‘දිගුකාලීන COVID’ පදය සාමාන්‍යයෙන් පහත දෙවර්ගයම සඳහා භාවිතා වේ:
- අඛණ්ඩව රෝග ලක්ෂණ සහිත COVID-19 - සති 4කට වඩා වැඩි කාලයක් සඳහා රෝග ලක්ෂණ සහිත COVID-19
- පශ්චාත්-COVID-19 තත්ත්වය/සහලක්ෂණය- විකල්ප රෝග විනිශ්චයකින් පැහැදිලි නොකළ සති 12කට පසුව පවත්නා COVID-19 රෝග ලක්ෂණ.
දිගුකාලීන COVID විවිධ පුද්ගලයන්හට විවිධ ආකාරයෙන් ඇති වන අතර සුළු සිට බරපතළ ආකාරයේ රෝග ලක්ෂණ ඇති විය හැකිය.
දිගුකාලීන COVID රෝග ලක්ෂණ
දිගුකාලීන COVID හි වඩාත් සුලබ රෝග ලක්ෂණ වනුයේ:
- අධික වෙහෙස (මහන්සිය)
- හුස්ම ගැනීමේ අපහසුතාව
- මතකය සහ අවධානය යොමු කිරීම පිළිබඳ ගැටළු (‘මොළය බොඳවීම’).
අනෙකුත් රෝගලක්ෂණවලට ඇතුළත් වනුයේ:
- අධික හෘද ස්පන්දනය, පපුවේ කැක්කුම සහ පපුවේ තදගතිය
- කැස්ස
- රසය හෝ සුවඳ දැනීමේ වෙනස්කම්
- හන්දි සහ මාංශපේශි වේදනාව
- කටු අනිනවා වැනි හැඟීම
- නිඳා ගැනීම පිළිබඳ ගැටළුව (නින්ද නොයාම)
- මුහුණුවරේ වෙනස්කම් (කරදර ගතිය, නොසන්සුන්කම හෝ විශාදය වැඩි වීම)
- කැරකෙන ස්වභාවය
- හිසරදය
- මඳ උණ ගතිය
- සමේ දද, හිසකෙස් යාම
- ඔක්කාරය, පාචනය, බඩේ කැක්කුම, ආහාර රුචිය නැති වීම.
ළමුන් තුළ, පහත දැක්වෙන රෝග ලක්ෂණ ඇති වේ:
- මුහුණුවර රෝග ලක්ෂණ
- අධික වෙහෙස
- නිඳාගැනීම හා අදාළ ගැටළු.
දිගුකාලීන COVID සඳහා අවදානම් සාධක
පහත දැක්වෙන පුද්ගලයින්හට දිගුකාලීන COVID ඇතිවීමට ඉඩ තිබේ:
- එන්නත් ලබා නොගත්
- COVID-19 හේතුවෙන් දැඩි ලෙස රෝගී වූ, රෝහල්ගත වූ හෝ දැඩිසත්කාර ඒකකයේ ප්‍රතිකාර ලැබූ අය
- COVID-19 වැළඳීමට පෙර නිදන්ගත තත්ත්වයන් හෝ රෝග වැළඳී සිටින අය, එනම් අධි රුධිර පීඩනය, දිගුකාලීන පෙනහළු රෝගය, දියවැඩියාව, සහ ස්ථුලභාවය.
දිගුකාලීන COVID සඳහා ප්‍රතිකාර ලබා ගැනීම
ඔබට COVID-19 වැළඳුණු පසුව අඛණ්ඩව ඇති වන රෝග ලක්ෂණ ගැන ඔබ කරදරයට පත්ව සිටී නම්, ඔබ වෛද්‍ය සමාලෝචනයක් සඳහා ඔබේ වෛද්‍යවරයා හමු වන්න.
දිගුකාලීන COVID සඳහා පරීක්ෂණයක් නැත. ඔබේ වෛද්‍යවරයා විසින් ඔබගේ රෝග ලක්ෂණ සහ ඔබේ ජීවිතයට ඒවායේ ඇති බලපෑම ඔබෙන් විමසා සිටිය හැකිය. ඔබේ රෝග ලක්ෂණ ඇති වීම සඳහා වන හේතු හඳුනා ගැනීමට සහ අනෙකුත් තත්ත්වයන් බැහැර කරවා ගැනීමට ඔවුන් සමහර පරීක්ෂණ සිදු කිරීමට යෝජනා කරනු ඇත.
දිගුකාලීන COVID වලට ප්‍රතිකාර කිරීමට තනි ප්‍රතිකාරයක් හෝ ඖෂධයක් නොමැත. ඔබට අවශ්‍ය විය හැකි රැකවරණය සහ සහාය ගැන ඔබේ වෛද්‍යවරයා ඔබ සමඟ කතා කරනු ඇත. ඔබට පහත දෑ සම්බන්ධයෙන් ඔවුන් උපදෙස් ලබා දෙනු ඇත:
- රෝග ලක්ෂණ දිනපොතක් භාවිතා කිරීම වැනි රෝග ලක්ෂණ නිවසේදී අධීක්ෂණය කර කළමනාකරණය කර ගැනීම
- වෛද්‍ය රැකවරණය අවශ්‍ය විය හැකි රෝග ලක්ෂණ (රෝග ලක්ෂණ නරක අතට පත්වීම වැනි) සහ ඔබට මෙම රෝග ලක්ෂණ ඇති වුවහොත් රැකවරණය සඳහා යා හැකි ස්ථාන මොනවාද
- COVID-19 සති ගණනකට සහ මාස ගණනකට පසුව අපේක්ෂා කළ හැකි දේවල් මොනවාද
- පෝෂණය, කායික ක්‍රියාකාරකම් සහ උපදේශනය වැනි ජීවන රටා මැදිහත්වීම් සඳහා උපකාර.
රෝග ලක්ෂණවලින් ඔබේ ජීවිතයට විශාල බලපෑමක් ඇති වුවහොත්, ඔබව විශේෂඥවරයෙකුට හෝ පුනරුත්තාපන සේවාවක් වෙත යොමු කෙරෙන අතර ඒවා මගින් ඔබේ රෝග ලක්ෂණ කළමනාකරණය කර ගෙන ඔබට සුව වීමට උපකාර කළ හැකිය.
දිගුකාලීන COVID වෙතින් සුව වීම
සුව වන කාලසීමාවන් එක් එක් පුද්ගලයාගෙන් වෙනස් වන අතර රෝග ලක්ෂණ කාලයක් සමඟ වෙනස් විය හැකිය. බොහෝ පුද්ගලයින් මාස 3 සිට 4 දක්වා කාලයකින් සුවපත් වේ. කෙසේවෙතත්, සමහර පුද්ගලයන්හට, වඩා දිගු රෝග ලක්ෂණ ඇති විය හැකිය.
දිගුකාලීන COVID වලින් ඔබවම ආරක්ෂා කර ගැනීම
දිගුකාලීන COVID වලින් ආරක්ෂා වීමේ හොඳම ක්‍රමය වනුයේ ඔබව ආසාදනය වීමෙන් වළක්වා ගැනීමය.
ඔබේ COVID-19 එන්නත් සම්බන්ධව යාවත්කාලව සිටීමෙන් ඔබට COVID-19 ආසාදනයෙන් වැළකී සිටීමට සහ ඔබව දැඩි ලෙස රෝගී වීමෙන් වැළකී සිටීමට උපකාරී වේ. එන්නත් ලබා නොගත් පුද්ගලයින්ට වඩා එන්නත් ලබා ගත් පුද්ගලයින්ට දිගුකාලීන COVID ගැන වාර්තා කිරීමේ ඉඩකඩ අඩුය.
රජයේ ප්‍රතිචාරය
සෞඛ්‍ය සහ වැඩිහිටි රැකවරණය අමාත්‍යවරයා වන පාර්ලිමේන්තු මන්ත්‍රී ගරු මාර්ක් බට්ලර් 2022 සැප්තැම්බර් මස 1 දින සිදු කළ යොමු කිරීමකින් පසුව, සෞඛ්‍ය, වැඩිහිටි රැකවරණය සහ ක්‍රීඩාව පිළිබඳ නිවාස ස්ථාවර කමිටුව විසින් ඒ පිළිබඳව සොයා බලන ලද අතර දිගුකාලීන COVID සහ නැවත හට ගන්නා COVID-19 පිළිබඳව වාර්තා කරන ලදි.
අන්තර්කාලීන වාර්තාව කියවන්න.
වැඩිදුර විස්තර
- දිගුකාලීන COVID සඳහා උපකාර ලබා ගැනීම
- පශ්චාත්-COVID-19 රෝග ලක්ෂණ සහ දිගුකාලීන COVID පිළිබඳව අවබෝධ කර ගැනීම
- රෝයල් ඕස්ට්‍රේලියන් කොලේජ් ඔෆ් ජෙනරල් ප්‍රැක්ටිෂනර්ස්, රෝගීන්ගේ මූලාශ්‍රය: පශ්චාත්-COVID-19 රෝග ලක්ෂණ කළමනාකරණය කර ගැනීම
- ජාතික සායනික සාක්ෂි පිළිබඳ COVID-19 කාර්යසාධන බලකාය, COVID-19 සහිත පුද්ගලයින්ගේ සායනික රැකවරණය සඳහා වන ඕස්ට්‍රේලියානු මාර්ගෝපදේශ.